BUTUAN CITY – Gi-angkon sa rebeldeng grupong New People’s Army kon NPA ang pag-ambush patay sa kapitan sa lungsod sa San Luis, Agusan Del Sur kagahapon sa udto.
Gi -ila mismo sa nagpailang tigpamaba sa NPA nga si Ka Omar Ibarra ang napatay nga si Kapitan Rodencio Salamurin sa Barangay San Pedro, San Luiz, Agusan Del Sur.
Sumala pa ni Ka Ibarra, nagmalampuson ang ilang pag-ambush sa kapitan sa may Purok-1, Barangay Don Alejandro sakop ra usab sa maong lungsod.
Gilatag pa ni Ka Ibarra ang tulo ka mga rason nganung gisilotan matud pa nila sa kamatayon ang kapitan. Kini mao matud pa ang pagpangespiya sa rebulusyunaryong kalihukan, pagpagamit sa iyang single motor diha sa pagpatay sa mga yanung sibilyan og ang pag-gamit sa ngalan sa NPA diha sa pagpangolekta ug buhis.
Apan sa pakighinabi kang Police Senior Insp. Emersin Bajao, Hepe sa San Luis Municipal Police Station, gipahayag niining base sa ilang inisyal nga imbestigasyon, dili ambush ang nahitabong pagpatay kang kapitan Salamurin.
Sumala pa sa hepe, gikan sa panimalay ang kapitan og muadtu unta sa ,munisipyo aron motambong sa meeting, apan pag-abot sa nahitaboan, gipara matud pa kini sa tulo ka armadong lalaki nga naka-bonnet hinungdang mihunong ang kapitan.
Gi-isa pa niini ang duha ka kamot nga nagpasabot lang sa iyang pagsurender, apan gipusil gihapon kini sa maka-upat ka higayon. (Rolan Janea)
