BUTUAN CITY – Gikumpirma ni Lt. Col. Eugenio Osias, tigpamaba sa 4th ID Diamong Division, Philippine Army nga dunay standard operating procedure kon SOP nga himoon sa 16 ka mga tropa sa kagamhanan nga gibuhian na karun sa New People’s Army kon NPA.
Sumala pa ni Lt. Col. Osias, kinahanglang tan-awon ang panglawas sa mga bihag og ipailalom kini sa custodial debriefing diin sutaon kung unsa gayud ang tinood nga nahitabo ilabina niadtong Disyembre 2018 diin nahitabo ang walay buto nga pag-raid sa CAFGU detachment sa Brgy. New Tubigon, Sibagat, Agusan Del Sur diin nabihag ang tanang sulod niini ang 14 ka tropa sa kagamhanan og nabitbit ang nagkadaiyang klase sa armas.
Kini matud pa ang mahimong basehan sa ilang ipagawas nga desisyon sa mga bag-ong gipagawas nga bihag.
Nasayrang niadtong Pebrero 14 sa dihang gibuhian ang 6 ka mga CAFGU samtang niadtong Lunes, Pebrero 18, gisunod sa pagbuhi ang laing 2 ka CAFGU ug kagahapon hingpit nang gibuhian ang nahabiling 8 ka mga tropa sa kagamhanan diin ang duha niini regular nga miyembro sa Philippine Army. (Rolan Janea)
