BUTUAN CITY – Ang kawala’y nalambigitang kremin o kaha anomaliya sa ilang pagserbisyo sa gobyerno og sa katawhan, ang nag-unang rason nga gibuhian na sa rebeldeng New People’s Army kon NPA kaganina ang walo ka mga tropa sa gobyerno nga gibansagang ‘Agusan 16’.
Sa eksklusibong pakighinabi sa Bombo Radyo Butuan, gipadayag ni Ka Joaquin – tigpamaba sa National Democratic Front of the Philippines kon NDFP-Mindanao nga gihimo ang pagbuhi sa ilang mga bihag sa bukirang bahin sa Bayugan City lalawigan sa Agusan del Sur.
Gibutyag ni Ka Joaquin nga apil usab sa ilang gikonsidera mao ang hangyo sa kabanay sa ilang mga bihag tungod kay wala na sila’y bread winner sukad sila nabihag og nadugang pa niini ang humanitarian consideration.
Giklaro pa ni Ka Joaquin – tigpamaba sa National Democratic Front of the Philippines kon NDFP-Mindanao nga hugot silang nagsunod sa ilang palisiya nga dili pasipad-an ang ilang mga bihag isip pagsunod na usab sa balaud sa gubat.
Apil sa mga gibuhian sila Cpl. Eric Manangan, PFC Darlino Cariño Jr. og ang mga Civilian Active Auxiliary kon CAA members nga sila Jemuel Acevedo, Rolando Iyao ingon man ang magkabanay nga Iligan nga sila Jemuel, John-John, James og Adel Iligan. (Beth Ruiz)
