BUTUAN CITY – Ipa-ilalom sa medical procedures sa Camp Evangelista sa Cagayan de Oro City ang unom sa 12 ka mga CAFGU members nga gibuhian sa mga rebeldeng New People’s Army kon NPA sa kinapungkayang bahin sa bukid sa Brgy. San Juan, Bayugan City sa Agusan del Sur.
Apil sa gibuhian sila Eddie Tindoy, Bienvenido Alamyon, Hermelito og Marson Iligan, Julian Gaviola Jr. og Sonny Mahubay kinsa una nang gidagit niadtong Disyembre ning mi-aging tuig human ang wala’y buto nga pag-raid sa ilang detachment sa New Tubigon, lungsod sa Sibagat, lalawigan sa Agusan del Sur.
Apil sa gidagit ang duha ka mga sundalong sila Danilo Carino og Eric Calapan og laing duha ka CAFGU members nga ilang nalabyan, gawas nga gidala usab nila ang 20 ka nga mga armas apil na ang M203 grenade rifle og usa ka machine gun.
Una nang gisaad sa mga rebelde nga buhian ang ilang mga bihag adiser mag-Pasko apan wala mahinayon tungod kay wala man gisanong sa gobyerno ang hangyo nilang temporaryong ihunong una ang operasyong militar. (Beth Ruiz)
