BUTUAN CITY – Andam na alang sa formal launching ugmang adlawa, Miyerkules, ang Agusan del Sur Transport Cooperative kon AGSURTRANSCO human ang malampusong inspeksyon sa ilang siyam ka mga modernong yunit sa e-bus kagahapon pagpanguna mismo ni Land Transportation, Franchising and Regulatory Board kon LTFRB chairman Atty. Martin Delgra III ug Caraga regional director Ma. Kristina Cassion.
Sa eksklusibong pakighinabi sa Butuan Radyo Butuan, gibutyag ni Cassion nga ang maong mga yunit sa AGSURTRANSCO maoy ilang gihulip sa UV Express van units nga mubiyahe sa mga rutang Bayugan City padulong sa lungsod sa San Francisco ug vice versa, Bayugan City ngadto sa lungsod sa Talacogon ug vice versa ingon man San Francisco ug Bayugan City ug vice versa.
Ang nasangpit nga kooperatiba apil na sa ilang PUV Modernization Program kansa mipasar sa ilang inspeksyon tungod kay duna kini dash camera, CCTV, cash card, body marking ug Global Positioning System kon GPS.
Gidugang pa ni Cassion nga mipa-ilalom na sa training ang mga drivers ug konduktor sa nasangpit nga mga yunit aron mas andam na sila adiser pa ang paglusad sa maong mga yunit ug sa ilang biyahe nga magsugod gikan sa alas-singko sa sayong buntag ngadto na sa alas-otso sa gabii ug igarahe kini sa ilang compound.
Samtang gibutyag usab ni AGSURTRANSCO chairman Gilbert Dumanoy, sa pagkakaron, 9 pa mga bag-ong yunit ang anaa kanila nga aprubado sa Department of Trade and Industry kon DTI tungod kay duna kini’y Global Positioning System kon GPS, CCTV, speedometer ug uban pang gikinahanglan alang sa modernong gamit nga magseguro sa kaluwasan sa mga pasahero atol sa biyahe.
