BUTUAN CITY – Lima sa 73 ka mga COVID-19 suspect cases sa Caraga Region ang mi-expire na (nakalas) kondiin sa maong ihap, onse ang na-admit pa sa ospital samtang usa ang na-discharge na, ug 17 ang pending pa ang resulta sa gipa-ilawman nilang RT-PCR test ug upat ang alang sa specimen collection.
Sa 73, pinakadaghan ang natala sa Butuan City nga mi-abot sa 43 nga gisundan sa 12 sa Agusan del Norte; lima sa Cabadbaran City sa susamang lalawigan samtang upat sa lalawigan sa Agusan del Sur.
Nakatala usa og tagduha ka mga suspect cases ang Bagugan City, Tandag City sa Surigao del Sur ug ang lalawigan sa Surigao del Norte ug tag-usa sa Surigao City, Bislig city ug lalawigan sa Surigao del Sur.
Ang mga na-admit nga suspect cases anaa sa Caraga Regional Hospital sa Surigao City, MJ Santos Hospital, Butuan Doctor’s Hospital, Butuan Medical Center ug sa annex niini dinhi ning siyudad sa Butuan, ug sa DO Plaza Memorial Hospital sa Agusan del Sur ug sa Nasipit District Hospital sa Nasipit, Agusan del Norte.
Samtang ang kumpirmadong kaso sa COVID-19 ning rehiyon nagpabilin gihapon sa tulo kondiin duha na ang nakarekober samtang usa ang nagpabilin pa sa ospital.
