BUTUAN CITY – Panag-ilog sa yuta tali sa mga kabanay ang usa sa gitan-aw nga anggulo sa kapulisan sa San Miguel, Surigao del Sur kalabot sa ngilngig nga pagpatay sa usa ka lola.
Gi-ila ni SPO3 Beltran Gascon imbestigador sa San Miguel Municipal Police Station ang biktima nga si Milagros Cardona Tagbe, 70 anyos, usa ka mag uuma og residente sa Purok 3, Bgry. Caromata, sakop sa maong lungsod.
Sa inisyal nilang imbestigasyon nasuta nga pasado alas-kwatro sa hapon dihang gipangita sa biktima ang iyang gitugway nga kanding kansa gitu-ohang gidala sa wala pa mailang responsable ngadto sa kakahuyan.
Posible matud pang gihimong paon lang sa suspek ang kanding sa biktima aron subayon niini ang tingog sa inatimang mananap.
Pasado alas-7:30 na sa gabie dihang nadiskubrehan ang patay’ng lawas sa biktima nga wala na’y ulo.
Gitu-uhang gibunalan una sa suspek ang biktima adiser kini gilunggu-an sa li-og tungod sa narekober nga kahoy nga nagkadugo sa dapit nga nahitabuan. Nawala usab ang gidalang sundang sa biktima kansa gituohang maoy gigamit pagputol sa iyang ulo kansa padayon pang gipangita.
Gidugang sa opisyal, aduna na sila’y gigunitang witness nga maoy makatudlo kung kinsa ang nagkuha sa kanding. Samtang nagpadayon pa usab ang imbestigasyon sa kapulisan aron masuta ang uban pang motibo sa nahitabong kremin. (Melody Valledor)
