BUTUAN CITY – Temporaryong nahunong ang operasyon sa Philippine Atmospheric, Geophysical, Astronomical Services Administration kon PAGASA sa lungsod sa Hinatuan, Surigao del Sur tungod sa nangaguba nilang kagamitan atol sa pagtay-og sa kusog nga linog kagahapon sa buntag.
Sa eksklusibong pakighinabi sa Bombo Radyo Butuan, gibutyag ni chief meteorological officer Allan Rebo, duna’y nadamyos ang ilang transmitter side nga nahimutang sa ikapitong andana sa ilang dakbalay kondiin nabawog nga radar equipment ug posibleng duna pa’y nabali.
Hinuon wala ma-unsa ang ilang dagkong equipment sama sa transmitter ug receiver tungod kay nasulod kini sa kabinet ug wala matumba. Gawas niini, nangliki usab ang bungbong sa ilang dakbalay gikan sa ground floor hangtud na sa 7th floor.
Nasusi na usab sa mga sakop sa Municipal Engineering Office ang ground floor pa lang sa ilang dakbalay kondiin gibana-banang mu-abot sa kapin usa ka milyon ka pesos ang mugna niining damyos.
Bisan matud pa og operational ang ubang mga equipment apan tungod kay damyos ang transmitter side, rason nga dili gihapon sila maka-reading ug maka-scan. Kini nga mga damyos ila nang napa-abot ngadto sa ilang sentrong buhatan.
Human sa linog, wala una sila mu-report sa trabaho tungod sa posibilidad nga mahugno ang ilang dakbalay higayong duna’y kusog-kusog nga aftershocks.
Prayuridad nila ang ilang kinabuhi rason nga kung duna sila’y tuyo sulod sa ilang pito ka andanang buhatan, ma-ampingon sila sa ilang pagkuha sa mga gamit nga gusto nilang kuhaon.
