BUTUAN CITY – Dili matukib ang gibating kalipay sa pamilya Cea ning siyudad sa Butuan human nakasakmit og gold medal sa taekwondo under 74-kilogram category si Dave Cea sa nagpadayong 30th edition sa Southeast Asian Games.
Sa eksklusibong pakighinabi sa Bombo Radyo Butuan, gipadayag sa uyuan ni Dave Cea nga si Edwin Cea sa Purok 4, Brgy. Tagabaca ning siyudad nga na-engganyo ang amahan niining ipa-enrol siya sa maong sports aron makadepensa sa iyang kaugalingon human nabiktima sa pagpanglabni niadtong tuig 2010.
Tungod kay wala’y available nga judo-karate rason nga sa taekwondo nila gipa-enrol ang iyang pag-umangkon uban sa iyang anak kondiin paspas matud pa ang na-develop ang skills niini sa maong sports.
Mi-abot ang panahong nakuha siyang scholar sa National University sa Manila nga maoy nagpadala kaniya sa Palarong Pambansa 2019 kondiin mihakot siya og gold medal rason nga naka-apil siya sa SEA Games 2019.
Gila-uman na matud pa nilang maka-gold sa SEA Games si Dave tungod kay sa gawas sa nasud kini nag-training.
Nasayrang pinangga kini sa ilang mga silingan tungod kay ang iyang mga makat-unan, itudlo man usab niya sa mga estudyante aron dili musubay sa dautang mga binuhatan o kaha bisyo.
Sa pagkakaron, plano ni Dave nga musalmot sa Olympics apan mu-apil pa siya sa pipila ka mga international competitions ug mag-training una sa laing nasud apan higayong maka-uli kini sa ilang lugar, mutabang matud pa kini sa iyang mga ginikanan.
