BUTUAN CITY – Paningkamutan sa lokal nga kagamhanan ning siyudad sa Butuan nga makapahigayon ug pulong kauban ang mga hingtungdang government agencies subay sa pagpatuman sa kamanduan sa Securities and Exchange Commission kon SEC alang sa hingpit nang pagpasira sa mga opisina sa Kabus Padatoon kon KAPA Community Ministry International Inc.
Sa pakighinabi ning sibyahan ni city administrator Reynante Desiata, human nila nadawat ang SEC advisory niadtong Mayo 2, nagtakda gilayon sila og pulong tali sa hingtungdang ahensiya apan wala pa kini natuman tungod sa apela sa KAPA.
Posibleng sulod ning semanaha o kaha sunod semana mahitabo ang tigom ilang aron tun-an ang pagpatuman sa kamanduan ilabina kay daghang mga pulis ang gika-ingong miyembro sa KAPA.
Samtang sa kabahinan usab ni Police Captain Emerson Alipit, tigpamaba sa Butuan City Police Office, giklaro niining andam silang mu-assist lang base matud pa sa nakalatid sa SEC advisory.
Gihimakak usab niini ang alegasyon sa kadaghanan nga wala sila milihok sa kamanduan sa SEC tungod kay daghang mga pulis ang miyembro niini.
