BUTUAN CITY – Lauman nga ianunsiyo ang ceasefire tali sa Israel ug Hezbollah sa Lebanon ning semanaha sumala sa usa ka Lebanese official nga pamilyar sa nasangpit nga hisgutanan.
Una nang gitaho nga tigumon ni Israeli Prime Minister Benjamin Netanyahu ang high-level security cabinet sa Tel Aviv para aprubahan ang ceasefire o hunong pinusilay tali sa Israel ug terror group nga Hezbollah sa Lebanon human ang kapin usa ka tuig nang giyera.
Ang sugyot nga ceasefire molungtad sa inisyal nga period nga 60 ka adlaw diin lakip sa mahimong kasabutan ang pag-withdraw sa Israeli forces gikan sa Lebanon.
Isip tubag, kuhaon usab sa Hezbollah ang ilang presensiya sa habagatan sa Litani River nga anaa sa 30 km amihanan sa international border ug hulipan ang mga niini og Lebanese Army troops.
Lakip sa ceasefire deal nga dapat walay Israeli-occupied buffer zone sa southern Lebanon.
Samtang ang US nga nagdumala sa 5-country committee dapat i-monitor ang pagpatuman sa ceasefire ug dapat i-oversee o atimanon sa Lebanese government ang pagpalit og mga armas ug produksiyon niini sa nasangpit nga nasud.
Mag-isyu usab ang US og sulat nga maghatag katungod sa Israel para atakehon ang Lebanon ugaling supakon sa Hezbollah ang ceasefire agreement.
