BUTUAN CITY – Miabot na sa upat ang kumpirmadong patay samtang usa ang kritikal human nga gidaro sa usa ka pick-up ang kasugat nga single motor ug Badja Center Car kaganinang alas 6:00 sa gabi-i sa may Barangay Amparo ning siyudad sa Butuan.
Nailhan ang tulo sa mga namatay nga biktima nga sila Jaime Otaza, 63-anyos nga taga Purok-3, Barangay Dankias og Belinda Bugnay, 26-anyos ngab taga P-7 MJ Santos nga nadala sa Butuan Medical Center samtang si Renato Ernosa, nga taga Sta. Cruz, Barangay Manila De Bugabos og laing babaye nga padayon pang giila ang nadala sa Santos Hospital.
Kritikal usab niini si Gregory Jaranilla nga taga Purok-13, Barangay Tungao, Butuan City nga landig karun sa Santos Hospital. Luwas na usab sa makuyaw nga kahimtang sila Russel Lintao, 19-anyos, estudyante nga anaa karun sa Santos Hospital, Joshua Pajal, 25-anyos nga residente sa Purok-7, Barangay MJ Santos nga anaa karun sa Agusan Del Norte Provincial Hospital og Clyde Ybañes nga taga Purok-13, Tungao, Butuan City nga nalandig sa Butuan Medical Center.
Sa inisyal nga nakuhang impormasyon, hilabihan kakusog ang dagan sa puting pick-up nga gikan sa ibabaw nga bahin og padulong unta sa Butuan City apan pag-abot sa nahitaboan, nabang-gaan niini ang duha ka single motor ug Badja Center Car nga parehong dunay sakay usab nga mga pasahero.
Tungod sa kakusog sa pagkabangga, nabaliktad ang pick-up samtang guba usab ang lain pang mga sakyanan.
Sa nasagap nga impormasyon ning sibyahan, nakahimu pa pagsibat ang drayber sa maong pick-up nga misurender usab sa may Butuan City Police Station-1 apan wala pa kini nakumpirma sa kapulisan.
