BUTUAN CITY – Gidayeg sa kapulisan sa Dinagat Island province ang pakig-alayon sa usa ka mangingisda sa Cagdianao Municipal Police Station human nadiskubrehan ang 37 ka bloke sa wala pa masutang substance nga naglutaw sa baybayon sa Sitio Habingan, Brgy. Poblacion sakop sa lungsod sa Cagdianao.
Sigon ni P/Sr. Supt. Daniel Puesca – provincial director sa Dinagat Islands Police Provincial Office, nagdala og usa ka sample niini sa Cagdianao Municipal Police Station si Gonie Curada, minyo og residente sa Purok 2 sa sakop sa maong barangay.
Sa eksklusibong interview sa Bombo Radyo Butuan, gipadayag sa opisyal nga dali nila kining gipasusi sa PNP Crime Laboratory-Caraga og gihulat na lang nila ang resulta niini.
Posible matud pang napadpad lang kini sa baybayon tungod sa balud ilabina nga wala sila’y nakitang barko o kaha bisan unsa mang sakyanang pandagat sa maong kadagatan. (Beth Ruiz)
