BUTUAN CITY – Padayon pang gi-ila ang duha sa tulo ka mga rebeldeng New People’s Army kon NPA nga napatay sa engkuwentro kagahapon sa ala-1:30 sa hapon sa may Sitio Patagon, Barangay Anticala ning siyudad sa Butuan.
Gikumpirma mismo ang maong hitabo ni 1lt. Edmar Colagong, Civil Military Operation kon CMO Officer sa 29th Infantry Battalion, Philippine Army sa pakighinabi ning sibyahan.
Sumala pa sa opisyal sa pakighinabi sa Bombo Radyo Butuan, na-agbat sa tropa sa kagamhanan ang grupo sa Guerilla Front Committee 21 sa NPA nga gipangunahan ni Ka Toto Anub, alyas Ka Dongkoy/ka Makoy kondiin milungtad sa 10 minutos ang giyera nga miresulta sa kamatayon sa 3 ka NPA Member.
Gipakanaog gilayon ang mga patay’ng lawas og gipakita sa barangay kondiin na-ilhan ang usa sa mga niini nga si Boboy Dapiniagan.
Gi-turn over usab ngadto sa kapulisan ang mga patay’ng lawas aron mailhan og mahatag ngadto sa ilang pamilya.
Lakip usab sa narekober human sa engkuwentro ang tag-usa ka AK47, M16 og M203 rifles. (Rolan Janea)
