BUTUAN CITY – Padayon pa ang imbestigasyon sa Surigao City Police Station aron makuha ang kinatibuk-ang istorya sa natigayong landslide sa illegal mining area sa Sitio Piriko, Purok Tagbunuan, Brgy Mabini, Surigao City sa lalawigan sa Surigao del Norte nga mikalas og duha ka minero samtang laing usa ang angol.
Gi-ila ni PLCol Mariano Lukban, ang hepe sa Surigao City Police Station ang mga namatay nga sila Gernando Paymalan Sr., 56-anyos, barangay tanod ug ang tricycle driver nga si Charlito Tañania, samtang naluwas si Vic Manuel Dela Torre.
Nasuta sa ilang inisyal nga imbestigasyon nga gihimuan matud pa og tunnel ang ilalom sa bukirang bahin sa maong lugar nga mao matud pa’y nahugno tungod sa pila ka adlaw nga pag-ulan rason nga natabunan sa midahiling yuta nga duna’y sagol nga bato ang mga biktima.
Giklaro usab sa opisyal nga pila ka higayon na nilang gi-operetan ang maong lugar tungod sa balik-balik nga pagpangmina taliwa nga dugay na kining gidili.
Mu-lie low lang matud pa sa ilang na-andang tago-tago nga pagmina ang mga residente ilabina kung anaa ang ilang pwersa rason nga makonsiderang leksyon na usab ngadto kanila ang nahitabo kagahapon.
