BUTUAN CITY – Gipakusgan sa Department of Health (DOH) ang programa nga Doctors to the Barrios (DTTB) pinaagi sa pag-deploy sa 290 ka mga doktor ngadto sa mga geographically isolated ug disadvantaged areas (GIDAs) sa tibuok nasud — ang pinakadako nga batch sukad sa pagsugod sa programa.
Sigon ni Health Secretary Teodoro Herbosa, kini nga deployment nagtuman sa saad ni President Ferdinand Marcos Jr. sa iyang State of the Nation Address (SONA) nga walay lungsod sa Pilipinas nga magpabilin nga walay doktor.
Ang gipili nga lugar mao kadtong mga GIDAs sama sa mga kabaryohan sa baybayon, kabukiran, ug mga ikalima hangtod ikaunom nga klase nga munisipyo nga kasagaran wala’y doktor.
Ang 290 ka doktor nga kadaghanan mga scholar sa DOH ug Commission on Higher Education kon CHED, magserbisyo sulod sa tulo ka tuig nga nagpunting sa primary healthcare, nutrisyon, ug maternal care.
Dugang ni Herbosa, ang programa nakahatag na og dakong kausaban sa national health outcomes.
