BUTUAN CITY – Suspendido ang face-to-face classes sa Iloilo City gikan sa Miyerkules hangtud Biernes kon Pebrero 25 hangtud 27 tungod sa pag-host sa siyudad sa senior level meetings sa Association of Southeast Asian Nations kon ASEAN.
Base sa ASEAN 2026 national calendar, himuon sa maong siyudad ang ika-49 nga pa high-level meeting sa Task Force on ASEAN Economic Integration sa maong mga adlaw.
Sigon ni PCol Gilbert Parilla, officer-in-charge sa Iloilo City Police Office, gi-aprubahan na ni Iloilo City Mayor Raisa Maria Lourdes Sarabia Treñas-Chu, ang rekomendasyon nga isuspende ang klase isip kabahin sa security protocol ug aron makatabang nga mapagaan ang dagan sa trapiko sa maong mga kalihukan.
Gawas niini, ila usab nga girekomenda ang pagpatuman sa gun ban ug ila pang gihulatan ang pag-apruba niini sa Regional Civil Security Unit sa Philippine National Police.
Gila-umang mangabot ang mga delegado karong weekend rason nga ablihan na usab ang Multi-Agency Coordinating Center aron seguraduhon ang maayong dagan sa mga kalilhukan.
Nasayrang mag-host og tulo ka ASEAN meetings ang Iloilo City kondiin ang nahabiling duha, himuon sa Abril ug Mayo.
