BUTUAN CITY – Mi-abot sa 25-kilos sa nagkada-iyang klase sa basura ang nakuha sa nagkada-iyang ahensya sa gobyerno nga milambigit sa gipahigayong Inter-Agency Scubasurero sa kadagatan sa lungsod sa Carmen, Agusan del Norte.
Ang maong kalihukan, gipasi-ugdahan sa Bureau of Fisheries and Aquatic Resources kon BFAR-Caraga isip parte sa ilang nakahan-ay nga mga kalihukan niadtong Mayo nga gideklarang Month of Ocean.
Sigon ni Philippine Coast Guard Ensign John Emman Calva, nakuha ang maong mga basura sa Brgy. Tagcatong ug Cahayagan sa maong lungsod nga kadaghanan, mga single-use plastic sama sa mga putos nga na-unlod na ilalom sa dagat kansa maka-apekto og dako sa wildlife.
Dugang pa ni Calva, dili lang mabasol ang mga residente ug mga bisita sa maong dapit nga naka-contribute sa daghang mga basura tungod kay duna matud pa’y mga higayon nga ma-anod ang mga basura gikan sa mga sapa ug suba.
Samtang isip kabahin sa ilang trabaho nga protektahan ang kina-iyahan uban sa lain pang mga ahensya sa gobyerno, giklaro ni Calva nga tumong sa maong kalihukan nga mapahibalo ang tanan nga ang mga yanong basurang gipanglabay sa bisan asa, mahimong makaon sa mga wildlife ug maka-apekto pa sa atong mga rekursos naturales.
