BUTUAN CITY- Nagkahiusa ang tanang rehiyon sa Mindanao sa 2026 BIR Tax Campaign Kick-off nga dunay temang “Mahusay na Serbisyo, Katumbas ng Buwis Mo,” sa Father Saturnino Urios University kon FSUU Gym ning syudad sa Butuan.
Ang maong kalihokan usa ka tinuig nga aktibidad sa Bureau of Internal Revenue kon BIR aron ipahinumdom sa katawhan ang importansya sa pagbayad sa buwis — dili lang tungod kay obligasyon, apan isip kontribusyon sa paglambo sa nasud.
Pinaagi sa mga buwis nga malikom, magmugna kini og pondo alang sa mas maayo nga serbisyo publiko sama sa edukasyon, kalsada, ug panglawas. Gani, gidasig ang tanan nga magbayad sa buwis bisan wala pa ang deadline karong Abril.
Atol sa okasyon, gipresentar usab ang bag-ong logo sa kampanya, simbolo sa mas bag-ong direksiyon sa ahensiya paingon sa episyente ug transparent nga serbisyo publiko.
Daku ang suporta sa City Government of Butuan ug gipasalig nga padayon kining makigtambayayong aron mas mapadali ug mapaayo ang proseso sa pagbayad sa buwis.
