BUTUAN CITY – Gitu-uhan ni Lt. Col. Roden Orbon, tigpamaba sa 6th Infantry ‘Kampilan’ Division, Philippine Army nga posibleng mi-abot na sa 20 ang patay samtang laing lima ang angol sa binakbakay tali sa mga factions sa Moro Islamic Liberation Front kon MILF sa Pagalungan, Maguindanao del Sur.
Nag-ugat ang kagubot gikan sa dugay nang gibangi-an nilang kapin sa 280-ektaryang yuta tali sa 105th Base Command sa MILF pagpanguna ni Engr. Alonto Sultan batuk sa 128th ug 129th Base Commands nga gipangunahan ni Commander Ikot Akmad. Kini ang pinaka-ulahing pag-ulbo sa kagubot tali sa grupo ni Engr. Sultan ug sa pwersa ni Commander Akmad.
Ubay-ubay nga mga high-powered firearms ang nakumpiska sa militar atol sa security operations apil na ang upat ka mga M16 rifles, tag-usa ka M14 rifle ug .45 kalibre nga pistola, nagkada-iyang magazines ug mga bala. Ang maong insidente mipabakwit sa 30 ka mga pamilya ug dihang napakalma na sa mga otoridad ang maong lugar, namalik na sa ilang pinuy-anan ang uban.
Sigon ni Lt. Col. Orbon. Maj. Gen. Antonio G. Nafarrete, Commander sa 6th Infantry (Kampilan) Division ug Joint Task Force Central, nagduso an og reklamo ang Armed Forces of the Philippines (AFP) tungod sa paglapas matud pa sa ceasefire sa 105th, 128th, ug 129th MILF Base Commands. Dugang ni Nafarrete, pabiling andam ang militar pagresponde higayong mahulga na ang kaluwasan sa mga sibilyan atol sa kagubot.
