BUTUAN CITY – Nagpadayon karun ang search and rescue operation sa 3 pa ka mga missing sa pagtiklaob sa usa ka rubber speedboat ning mi-aging alas 2:00 sa hapon sa kadagatan sa Sitio Baugo, Barangay Bucawe, Lianga, Surigao del Sur.
Sa pagkumpirma ni P/ Insp. Archie Amores-Hepe sa Lianga Municipal Police Station, gibutyag niini nga walo ang sakay sa speed boat nga pulos taga Barangay Latao, lungsod sa Esperanza, Agusan Del Sur ug nangaligo sa maong dapit.
Dili matud pa suhito ang nagmaneho sa speed boat sa kadagatan sa maong lugar hinungdan nga mitiklaob ki ni human gihapak sa dagkong balud.
Sa maong insedente naluwas sila Senon Cañete, 47-anyos, Merjanlyn Cañete, 12-anyos ug Maria Mercedes Tindoy, 20-anyos nga daling gidala sa Lianga District Hospital.
Apan dead-on arrival usab sila Ivan Tindoy 9-anyos ug Kristine May Tindoy 13-anyos samtang nagpabiling missing sila Michael Tindoy 21-anyos, Kevin Tindoy 19-anyos ug Lolong Ombayan 16-anyos.
Gi-flash alarm na kini nga hitabo ngadto sa kapulisan sa kasikbit nilang mga lungsod dungan sa pagpahimangno sa mga nangaligo nga magma-ampingon sa kanunay.
Nasayrang niadtong Domingo sa Pagkabanhaw usab, dunay nalumos patay nga usa ka hubog sa Tagbina, Surigao Del Sur. (Rolan Janea)
