BUTUAN CITY – Gihaya na ang patay’ng lawas sa duha ka minero nga na-suffocate sa mine gas ilalom sa tunnel sa Brgy. Das-agan, San Francisco Agusan del Sur adtong nakalabay nga adlaw.
Sa pakighinabi sa Bombo Radyo Butuan, gi-ila ni Police Staff Sergeant Forcy Laurito, Chief investigator sa San Fransisco Municipal Station ang mga biktimang sila Jonathan Candelasa, 15-anyos ug Rixie John Fernander 21, pulos mga residente sa Brgy. Grace Estate, Bayugan City sa maong lalawigan.
Sumala ni Police Staff Sergeant Laurito, magkuha lang unta og submersible pump ang mga biktima uban ang laing tulo ka uban niini sa gi-abandona na nga parte sa ilang gitrabahoang tunnel nga dunay kaladmon nga 45-metro dihang natigayon ang insidente.
Naglisod matod pa sila pagginhawa human gihab-wa ang tubig nga anaa sa ubos sa tunnel ug tungod sa pagningkamot nga makaginhawa natumba ang duha ka biktima sa tubig nga nagpasamot sa ilang sitwasyon hangtud nga namatay
Dali usab gidala pinakaduol nga balay tambalanan ang laing tulo human nakalanghab sa nasangpit nga gas.
Wala’y nakitang ebidensya ang mga otoridad nga dunay foul play sa maong insidente.
