BUTUAN CITY – Usa ang anaa sa talandugong kahimtang samtang laing usa ang nagpa-alim pa sa balay-tambalanan human gipusil sa wala pa mailang lalaki nga sakay sa motorsiklo ning mi-aging alas-onse sa sa buntag sa may Agay, Brgy. Poblacion, lungsod sa RTR, Agusan del Norte.
Anaa karon sa intensive care unit kon ICU ang 42-anyos nga si Ramil Hagunos, minyo og residente sa maong dapit samtang luwas na gikan sa delikadong kahimtang si Jepty Supas, 29-anyos, ulitawo og residente sa Purok 5, Brgy. Bawbawan sa susamang lungsod.
Gibutyag ni Supas nga nagbaktas na sila pauli gikan nag-tresher dihang mihunong sa ilang tungod ang duha ka lalaking sakay sa motorsiklo dayong pa-andar apan pag-abot sa unahan dinhi na sila gipamusil.
Nasayrang na-igo sa likod lapos sa tiyan ingon man sa li-og si Hagunos samtang siya, na-igo usab sa kilid sa lawas. (Beth Ruiz)
