BUTUAN CITY – Gidugok sa bagang duot sa katawhan ang unang adlaw sa tulo ka adlaw nga National Vaccination Days dinhi sa dakbayan sa Butuan nga gisugdan ning adlawa.
Sa eksklusibong pakighinabi sa Bombo Radyo Butuan, gipadayag Butuan City Councilor Cherry Mae Busa, chairman sa Committee on Health sa Sanggunang Panlungsod nga gibuksan kini pinaagi sa ceremonial vaccination pagpanguna ni Department of Health kon DOH-Caraga Regional Director Cesar Cassion isip simbolo sa pagsugod sa tulo ka adlaw nga Bayanihan, Bakunahan.
Gipadayag sa konsehal nga apil sa gidugok ang SM City ug sa uban pang mga sites ug barangay vaccination sites.
Gani ang matag-site duna’y gidugang nga mga volunteers aron lang makab-ot ang target ning siyudad nga bakunahan nga mu-abot sa 15,000 ka mga indibidwal kada-adlaw kon kinatibuk-ang 45,000 sa tulo ka adlaw nga Bakunahan aron matabangan ang nasudnong kagamhanan nga makab-ot ang target nga 9 million ka mga indibidwal nga mabakunahan sa tibuok Pilipinas.
Nasayrang gawas sa SM City Butuan ug Robinsons Place, apil sa mga vaccination sites ang McDonalds sa Gaisano, Manuel J. Santos Hospital, Butuan Doctors Hospital, FSUU Main Gym, Butuan Medical Center, ug PNP Hospital Libertad.
Gipanawagan sa opisyal ang tanang mga residente sa Butuan nga mosanong sa Bayanihan, Bakunahan alang sa proteksyon sa kaugalingon ug pamilya.
