BUTUAN CITY – Mi-abot sa 19 ka mga rebeldeng New People’s Army kon NPA ang napatay sa engkwentro tali sa militar sa Brgy Salamanca, lungsod sa Toboso, Negros Occidental nga nagsugod kagahapon sa kaadlawon ug milungtad pagka-hapon.
Sigon ni LCol Eric Alfonso, commander sa 79th Infantry Battalion, Philippine Army, apil sa napatay si Arnel Tapang, ang most wanted NPA leader nga duna’y patong sa ulo nga usa ka milyon ka pisos.
Nahulog matud pa sa fishpond ang mga patay nang rebelde ug nadugay-dugayan ang gihimong retrieval operation kondiin siyam ka mga armas ang narekober sa encounter site. Samtang sa panig sa mga sundalo, usa kanila ang angol ug natambalan na.
Nasayrang tungod sa taas-taas nga engkwentro, mi-abot sa 653 ka mga indibidwal kon 168 ka mga pamilya gikan sa tulo ka mga barangay sa maong lungsod ang nanghikling ug naghulat pa og abiso sa militar kung luwas na bang mubalik sa ilang mga pinuy-anan.
