BUTUAN CITY – Gikumpirma ni Dr. Chrismar Mocorro, ang OIC chief of hospital sa Surigao del Norte Provincial Hospital nga usa sa 87 ka mga stranded nga magtutunghang namalik gikan sa Mindanao State University kon MSU sa Marawi City ug Iligan City ang nagpositibo sa rapid anti-body test.
Mahinumdumang niadtong Sabado, Mayo 16, ang tanang 87 ka mga estudyanteng gikan sa ilang lalawigan gipa-ilalom sa maong test uban sa laing usa nga taga-Siargao Island nga gipa-ilalom sa inconclusive test kinsa gi-quarantine karon sa Provincial Training Community Center sa Brgy. Bad-as lungsod sa Placer sa Surigao del Norte.
Niadtong Martes, Mayo 19, subling gipa-ilalom sa rapid test ang maong estudyante ug sa gihimong validation sa ilang pathologist, migawas nga positibo siya sa coronavirus rason nga gi-eskedyol kini alang sa swabbing karong Mayo 25 didto sa Caraga Regional Hospital alang sa RT-PCR.
Nasayrang sukad sa pag-abot sa maong estudyante, wala kini magpakita og mga simtomas sa COVID-19 ug pabiling anaa sa maayong kondisyon apan padayon ang monitoring kaniya ug gihatagan usab siya og psycho-social support.
Subling gipahimangno sa maong ospital nga sa ingon niini nga panahon, kinahanglang kanunay’ng sundon ang stringent protocols alang sa proteksyon sa tanan sa ingon malikayan usab ang pagkaylap sa coronavirus.
