BUTUAN CITY – Sugdan na ugmang adlawa, Martes Marso 17, ang paghatag sa Php 5,000.00 nga cash assistance sa gobyerno alang sa mga tricycle driver sa Metro Manila.
Sigon ni Department of Social Welfare and Development kon DSWD Secretary Rex Gatchalian, magsugod ang simultaneous payout sa alas-6 sa buntag nga himuon sa 30 ka mga payout centers sa 17 ka mga local government units sa National Capital Region kon NCR.
Dili mu-ubos sa 139,000 ka mga tricycle drivers sa Metro Manila ang makadawat sa maong cash assistance aron magaan-gaanan ang ilang palas-anon karong padayon ang pagsaka sa presyo sa mga produktong petrolyo nga hatud sa padayong giyera sa Middle East.
Gipahinumduman usab ni Gatchalian ang mga tricycle drivers nga sundon ang ilang schedule sa payout ug dili magdungan sa pag-claim aron dili ma-apektuhan ang biyahe sa mga commuters.
