BUTUAN CITY – Hingpit nang gikoronahang Miss Universe 2019 si Miss South Africa Zozibini Tunzi human naparot ang laing 89 ka mga kandidata gikan sa nagkada-iyang nasud sa kalibutan sa coronation night nga gipahigayon sa Tyler Perry Studios sa Atlanta, Georgia, USA.
Nahimong first runner-up usab si Puerto Rico Madison Anderson samtang second runner-up si Miss Mexico Sofia Aragon samtang ang pambato sa Pilipinas nga si Gazini Christiana Jordi Ganados igo lang nakasulod sa Top 20 ug wala na mi-abante pa.
Unang gipakpakan sa Question and Answer portion sa Top 5 si Tunzi tungod sa iyang tubag sa pangutana kalabot sa iyang ma-suggest ngadto sa mga world leaders kung sa iyang lantaw dili ba igo ang gihimong lakang batuk sa climate change.
Gitubag ni Tunzi nga duna pa’y madugang nga mga aksyong himuon ang mga world leaders ilabina kung abagan kini sa matag-indibidwal.
Gani anaa pa siya sa Grade VI dihang iyang nasayran nga nag-anam na kadaut ug kamatay ang atong kalibutan rason nga anaa na kanato ang desisyon kung gustuhon natong mamahimong luwas ang kalibutan.
Human usab sa Q&A sa Top 3, bag-ong gipatuman sa ika-68 ka tuig nga edisyon sa Miss Universe ang final word kondiin mihatag og lig-ong mensahe si Tunzi kinsa usa ka social media activist nga nagdasig sa tanan nga ‘Be Yourself’.
Gipasa gilayon sa Pinay nga si Miss Universe 2018 Catriona Gray ang korona ngadto kang Tunzi.
