BUTUAN CITY – Plano matud pa sa administrasyong Marcos nga ideklarang terorista, sa sulod ug gawas sa nasud, aron malubong na siya uban sa kamatu-uran kalabot sa bilyunes pisos nga budget insertions ug uban pang mga anomaliya nga gihimo matud pa nila Pangulong Ferdinand Marcos Jr ug kanhi House Speaker Martin Romualdez sa 2025 national budget.
Kini ang unod sa pinakabag-ong exposé nga gipagawas ni resigned Ako Bicol partylist Rep Zaldy Co, human ang unang tulo ning mi-aging mga semana.
Sa iyang video statement, gipadayag ni Co nga dili siya maka-uli sa nasud tungod sa dili basta-bastang hulga sa iyang kinabuhi nga dugangan pa sa nakuha niyang impormasyong plano matud pa sa administrasyon nga ideklara siyang terorista sa sulod ug gawas sa nasud aron dali ra siyang mahipos uban sa kamatu-uran.
Gipanghimakak usab niini ang gipasi-atab sa Independent Commission for Infrastructure kon ICI ug ni kanhi DPWH-Bulacan 1st District Engr Henry Alcantara nga duna siya’y bahin sa bilyunes pisos nga kwartang gikurakot gikan sa pundo sa mga flood control projects.
Hinuon gipadayag niini nga sukad niadtong tuig 2022 hangtud karong tuiga, ang kwartang mi-agi kaniya aron ihatag sa manag-agaw, mi-abot ngadto sa 56-bilyunes pisos kondiin wala pa’y labot niini ang 100-bilyunes pisos nga insertions sa pangulo sa 2025 national budget.
Gani niadtong tuig 2022 dihang milingkod na siya isip chairman sa House Committee on Appropriations, gisultihan na siya ni Romualdez nga kinahanglang mala-deliver siya og dos-bilyunes pisos matag-buwan.
Gisaysay pa niini nga paglabay sa pila ka adlaw, gibisita siya ni Engr Alcantara ug gitudluan sa paagi sa binahinay sa kickbacks.
