BUTUAN CITY – Malampusong naluwas sa mga sakop sa Philippine Coast Guard-Surigao del Norte, Malimono sub-station ang usa ka mananagat nga taga-Dipolog City, Zamboanga del Norte kinsa siyam ka adlaw nang nagpalutaw-lutaw sa kadagatan human natangtang ang propeller sa gisakyan niyang bangkang panagatan.
Gi-ila ni Coast Guard Ensign Roy Christopher Orellaneda, tigpamaba sa Coast Guard Surigao del Norte Station ang ilang naluwas nga si Ronel Omandam, kinsa nanagat sa kalawran sa Dipolog City niadto pang Septembre 7 apan pagka-ugma Septembre 8, natangtang ang propeller sa ilang panagatan rason nga bisan asa na nga direksyon gidala sa balud ug kusog nga hangin ang bangka.
Napaduol kini sa baybayon sa Brgy. Cawayan, lungsod sa Malimono, nga nakita gilayon sa mga tawo rason nga girespondihan gilayon ug daling gi-atiman hangtud nga nabalik ang iyang kusog.
Migawas sa ilang imbestigasyon nga duna’y ka-uban si Omandam nga mi-ambak dapit sa Camiguin Island niadtong Septembre 13 sa alas-tres sa hapon aron languyon ang isla ug misaad nga balikan siya tungod kay wala man usa’y plano si Omandam nga mubiya sa ilang panagatan.
