BUTUAN CITY- Kanhi House appropriations committee chairperson Zaldy Co, kansa nagatubang og warrant of arrest gikan sa Sandiganbayan tungod sa kasong malversation ug graft nga adunay kalabotan sa P289-milyon nga flood control project sa Naujan, Oriental Mindoro, gi-taho nga mitungha sa Stockholm, Sweden niadtong Enero 15 base sa apostille nga gilakip sa iyang petisyon nga gisumite sa Korte Suprema.
Ang dokumento napamatud-ang personal nga gipermahan ni Co ang petisyon atubangan sa public notary sa Nacka, Stockholm, diin nagpasabot nga si Co anaa sa Sweden sa maong petsa, sukwahi sa giingon ni Interior Secretary Jonvic Remulla nga nakita kini sa Lisbon, Portugal.
Sa iyang petisyon, nangayo si Co og temporary restraining order batok sa resolusyon sa Ombudsman nga nagrekomenda sa kaso, ug iyang giakusahan si Ombudsman Jesus Crispin Remulla nga nagdali sa pagpasaka og reklamo bisan walay mahatag nga hustong proseso.
Gibarugan usab sa kampo ni Co nga wala kini mingtakas sa nasud, kondili mibiya kini tungod sa medical leave ug dili makabalik tungod sa hulga sa iyang kinabuhi. Sa pagkakaron, naghulat pa ang publiko sa tubag sa Ombudsman kabahin sa maong isyu.
