BUTUAN CITY – Gikumpirma sa Overseas Workers Welfare Administration kon OWWA-Caraga nga duna’y kapin sa 270 ka mga Caraganons ang atua karon sa Israel ug na-ipit sa gyera tali sa maong nasod ug sa Iran.
Sumala ni Rodell Deligero, Officer In Charge kon OIC sa OWWA Caraga, wala pay labot niini ang mga anaa sa kasikbit nga nasod sama sa Jordan ug sa Lebanon nga lakip usab sa mga apektadong lugar tungod sa gyera sa sa Israel. Gibutyag sa opisyal nga niadtu pang Hunyo 14 nila gipahugtan ang pag-bantay sa kahimtang sa mga OFWs sa maong nasod.
Dugang pa sa opisyal, dugay na ang gyera sa Israel, apan ningsaka lamang kini niadtung ikaduhang semana ning bulana rason sa gihanyag nga voluntary repatriation sa mga OFWs.
Nakig-alayon na usab sila ngadto sa mga pamilya sa mga Caraganong OFWs aron masayod sila sa ilang kahimtang.
Sigon ni Deligero, bisan og wala pay gyera sa maong mga nasod, duna na silay mga programa alang sa mga Overseas FIlipino Workers sama sa livelihood assistance, ingon man mga financial assistance nga gihatag sa kagamhanan. Aduna na usab sila’y mga developed programs ka-uban ang Department of Migrant Workers alang niadtung mga Pinoy nga mupauli tungod sa gyera.
