BUTUAN CITY – Wala pa’y klaro kung mutambong ba o dili si Vice President Sara Duterte sa sunod nga pagdungog sa House Committee on Good Government and Public Accountability karong Lunes human ang wala niya pagtambong kagahapon. Kini tungod sa pagbisita niya dinhi sa Butuan City aron pangunahan ang kasa-ulugan sa ika-89 nga founding anniversary sa Office of the Vice President kon OVP.
Sigon ni VP Sara, dihang gipadayag sa komite nga insufficient ug dili nila madawat ang iyang sworn affidavit, nagdesisyon siyang dili na muhimo pag-usab ug bahala na ang maong komite sa ilang gustong himuon. Ang pagtambong matud pa niya ug sa iyang mga sakop sa nasangpit nga pagdungog, case-to-case basis lang kung duna sila’y madawat nga imbitasyon ug depende usab sa desisyon sa iyang mga sakop.
Samtang subay sa pamahayag ni Zambales Congressman Jefferson ‘Jay’ Khungkon nga siya ang angayang basulon kung mawad-an ang Office of the Vice President og 200 ka mga trabahante, gipadayag ni VP wala na siya’y angayang tubagon ilabina kung gikan sa mga kongresistang gikan sa gibansagang ‘Young Guns’ bloc kansa gibansagan niyang mga ‘Young Goons.’
