BUTUAN CITY – Gikalipay sa legal experts ning dakbayan ang pagka-utingkay karon sa kaso sa mga missing nga sabungeros. Sumala ni Atty. Ver Quimco, dako nga kalambuan alang sa pamilya sa nasangpit nga mga biktima ang case buildup nga gihimo sa kagamhanan alang sa hustisya sa nangawala nga mga sabungeros nga matud pa, gipatay ug gitambog sa Taal Lake.
Apan sumala sa abugado, dili matud pa pasabot nga masakmit na sa mga pamilya sa mga missing sabungeros ang hustisya nga dugay na nilang gipangandoy.
Kini tungod kay kinahanglan pang patubagon ang mga tawong mihimo sa ngilngig nga kremin ilabina nga grabe kadugay ang justice system sa Pilipinas, ilabina nga gawas sa mga ebidensya, nagkinahanglan pa usab ang korte og mga buhing tistigo nga makapamatuod sa gihimo sa mga akusado.
Dugang pa Atty. Quimco, dili gayud mawala ang posibilidad nga paliton pa ang mga testimonya sa mga testigo, og dako pa ang posibilidad nga mubali ang mga niini pag-abot sa panahon, ilabina kung hisgutan na ang dinagko nga mga salapi.
Wala usab niini giwagtang ang mga posibilidad nga dunay kalambigitan sa politika ang pagpatim-aw karon sa whistleblower nga si Julie Patidongan.
Ang pamahayag ni Atty. Ver Quimco, legal expert ning dakbayan.
