BUTUAN CITY – Nagduso og motion to quash ang kampo ni kanhi Senador Ramon ‘Bong’ Revilla Jr sa Sandiganbayan aron ipabasura ang kasong malversation nga gipasaka batuk kaniya.
Sigon sa kampo sa kanhi senador, depektuso ang impormasyon tungod kay wala siya’y kostudiya o kontrol sa gika-ingong pundong mu-abot sa 92.8-milyunes pisos nga flood control projects sa Bulacan kansa nawaldas matud pa, gawas nga dili usab siya ang accountable officer.
Ang maong mosyon maoy gihimong basehan sa Sandiganbayan 3rd Division aron isibog ang iyang arraignment ug pre-trial ngadto sa Pebrero 9.
Sigon ni Associate Justice Carl Miranda, gisusi na sa korte ang argumento sa depensa nga naglatid nga wala matud pa’y klarong panagkunsabuhay o kaha common criminal desire.
Nakalatid pa sa mosyon nga dili klaro kung sa unsang paagi gilambigit ang 2025 General Appropriations Act sa akusasyon batuk sa senador ilabina ang pagpameke sa mga dokumento.
