BUTUAN CITY – Boluntaryong misurender ang usa ka kanhi miyembro sa Communist Terrorist Group (CTG) ngadto sa Cantilan Municipal Police Station ning nakalabayng adlaw.
Naila ang misurender nga si alyas “Jose”, 29 anyos, ulitawo, walay trabaho, ug lumulupyo sa Purok Bat-Awan 2, Brgy. Bangsod, Tago, Surigao del Sur. Base sa inisyal nga debriefing, kanhi Squad 2 Alpha Team Leader/Medic sa Regional Sentro de Grabidad Compaq (RSDG) sa NPA si Alyas Jose.
Nasayrang gikan 2014 ngadto sa 2024, mipartisipar na kini sa nagkada-iyang armadong engkwentro sulod sa rehiyon sa Caraga. Sa iyang pagsurender, gitugyan niini ang usa ka Rifle Grenade ug usa ka memory card nga naglakip sa mga sensitibong impormasyon sama sa tactical guides, combat procedures, ug plano sa operasyon.
Wala kini existing warrant of arrest, apan nalista siya sa Periodic Status Report (PSR) sa 75th IB para sa ikaduhang kwarter sa 2025.
Sa pagkakaron, anaa siya sa kustodiya sa Cantilan Municipal Police Station alang sa dokumentasyon, custodial debriefing, ug pagproseso para sa pag-apil sa Enhanced Comprehensive Local Integration Program (E-CLIP).
