BUTUAN CITY- Isip pagsaulod sa World Cancer Day niadtong Pebrero 4, sumala sa datos sa International Agency for Research on Cancer (IARC) nakatala sa Pilipinas ang gibanabana nga 188,976 ka bag-ong kaso sa kanser ug 113,369 ka pagkamatay sa 2022.
Ang breast cancer mao ang pinakadaghan nga bag-ong kaso, apan ang lung cancer gihapon ang nag-una sa pagkamatay. Gibanabana nga 466,012 ka Pilipino ang nagkinabuhi uban sa kanser sulod sa lima ka tuig sukad sa diagnosis. Sa tibuok kalibutan, natala ang 19.98 milyon ka bag-ong kaso ug 9.7 milyon ka pagkamatay sa 2022.
Giingon sa Worl Health Organization nga 30%–50% sa kanser mapugngan pinaagi sa bakuna, kontrol sa tabako, ug sayo nga pag-detect. Sa Pilipinas, gipasiugda ang National Integrated Cancer Control Act (RA 11215) ug ang 2024–2028 NICCP Strategic Framework aron palig-onon ang prevention ug access sa tambal.
Usa sa mga programa mao ang Bakuna Eskwela nga naghatag og HPV vaccination sa mga estudyante aron mapugngan ang cervical cancer. Apan, nagpadayon gihapon ang hagit sa gasto sa tambal ug access sa serbisyo medikal, ilabi na sa mga pasyente nga layo sa syudad.
