BUTUAN CITY – Emosyonal nga nagpasabot ang American actor nga si Will Smith sa namugnang kontrobersya atol sa 94th Academy o mas naila isip Oscar Awards sa Los Angeles, California kagahapon sa buntag, oras sa Pilipinas.
Sa nasangpit nga prestihiyosong seremonya, nasakmit ni Smith ang iyang unang Oscar trophy isip best actor alang sa sports drama film nga “King Richard.”
Ugat sa pagpangayu niini og pasaylo mao ang pagsaka sa stage aron laparuhon ang kaparehong comedian actor nga si Chris Rock tungod sa wala nagustuhang pasi-aw sa pagka-upaw sa iyang misis nga si Jada.
Nasulayan ang kainit sa ulo niini sa iyang karakter sa “King Richard” kinsa ‘fierce defender” sa iyang pamilya ang iyang papel isip Richard Williams.
Nasayran nga nakasinati og alopecia o hair loss si Jada rasong gipiling magpa-upaw na lang sukad niadtong nakalabay nga tuig.
Sa panig usab sa nalaparuhan nga si Rock, gipadayag sa Los Angeles Police Department (LAPD) nga mibalibad na kining idemanda si Smith.
Samtang dungan sa pagtimbaya sa kadumalahan sa Academy gipamugos sa mga niini nga wala nila gikunsinti ang bisan unsang klase sa kagubot sa ilang event.
Una nang nasakmit sa comedy-drama film nga CODA kon Child of Deaf Adults ang top prize isip Best Picture, samtang big winner usab ang Science-fiction movie nga “Dune” human nakahakot og unom ka pasidungog gikan sa 10 ka nominasyon niini.
Daug usab ang “Encanto” isip Best Animated Feature Film.
