BUTUAN CITY – Gipa-ambit ning sibyahan sa kanhi admin staff sa Bombo Radyo Butuan ang iyang hadlok nga kasinatian human niya nakit-an sa gipakuha niyang hulagway sa iyang kaugalingon ang usa ka gitu-uhang white lady nga mipatim-aw sa mismong life size nga samin nga anaa sa iyang likod.
Gibutyag ni Glenda Olalo-Batulan nga taga-Nasipit, Agusan del Norte nga hapit nang tungang gabii dihang nagpakuha siya sa maong hulagway kondiin anaa sa iyang likod ang samin.
Dako na lang ang ilang kakurat dihang sa ilang pagtan-aw sa duha niya ka hulagway, ang imahe sa usa ka porma og babaye nga nakasuot og puti nga sapot nga daw kinarsones sa ubos ang mitumaw sa samin nga dapat mupakita unta sa iyang reflection.
Nasayrang sa unang hulagway diin natabunan pa niya ang samin, makita gihapon sa ubos nga bahin ang tiil sa nakaputi nga babaye og sa ikaduhang hulagway, nakita na gyod ang tibuok porma niini apan daw gitabunan sa buhok ang iyang nawong.
Kung i-zoom ang maong hulagway, duna gihapo’y makitang mata, ilong og baba sa maong hulagway.
Hangtud karon, blangko pa si Glenda kung kinsa ang maong babayeng sabay nga mipahulagway kaniya. (Beth Ruiz)
