BUTUAN CITY – Gidayeg ni Presidential Communication Operations Office kon PCOO Secretary Martin Andanar ang zumba fitness program sa Cabadbaran City, lalawigan sa Agusan del Norte nga mao ang nga ‘Weight Loss Challenge’ kansa gilusad niadtong Lunes, Marso 22.
Sa Network News briefing, gipadayag ni Andanar nga wala magpa-ulahi ang maong siyudad sa uban usab nga mga local government units sa nasud nga naglusad sa ingon niini nga kalihukan kansa dako og ikatabang sa katawhan ning panahon sa pandemya.
Nanghinaut ang kalihim nga unta sundugon kini sa ubang mga local government units.
Samtang gipasabot ni Cabadbaran City Mayor Judy Chen-Amante ngadto kang Sec. Andanar nga ang maong fitness program usa ka 60 ka mga adlaw nga Weight Loss Challenge nga gituyo aron magpabiling himsog ang panglawas sa tanan ilabina nga daghan ang nadugangan ang timbang ning panahon sa pandemya.
Duna kini lima ka kategoriya nga duna’y gigahing dagkong ganti kondiin ang si kinsa mang dako og ikunhod sa timbang mao ang mudaog sa nasangpit ng challenge nga himuon matag-weekdays gawas lang sa Miyerkules ug matapos sa buwan sa Mayo.
Sigon sa mayor, sa pagkakaron mi-abot na sa 1,000 ang misalmot sa maong programa gikan sa nagkada-iyang sektor sa katilingban.
Positibo si Mayor Amante nga duna’y dako ug maayong epekto kini sa panglawas sa mga entranteng Cabadbaranons.
Kung maayo matud pa ang mamahimong resulta niini, ilang ilusad na usab ang ikaduhang hugna sa maong program nga posibleng i-apil nila sa ilang mga kalihukan alang sa charter day karong July.
