BUTUAN CITY – Gidepensahan ni Agusan del Sur Police Provincial Director PCol. Rogelio Raymundo Jr. ang gika-ingong wala pagsikop sa iyang mga sakop sa kapulisan sa lungsod sa Talacogon sa natigayong payout sa mga Forex Trading officers ngadto sa ilang mga investors.
Kini taliwa nga una nang gimando ni Pangulong Rodrigo Duterte ang pagpasira sa tanang investment scams og pagsikop sa mga opisyal niini gawas pa sa kamatu-uran nga gihimo ang pay-out sa bisinidad lamang sa Talacogon Municipal Police Station.
Sa eksklusibong pakighinabi ning sibyahan, gibutyag ni Col. Raymundo nga milihok lang ang iyang mga sakop dihang duna na’y natigayong komosyon.
Adiser matud pa nasayran sa iyang mga sakop nga payout na sa Forex ang natigayon rason nga mihimo na matud pa pagresponde ang kapulisan sa nasangpit nga police station.
Kini nga pamahayag sukwahi sa gipadayag sa pipila sa mga Forex investors nga atua sa maong lugar kinsa nag-asuy nga mismong ang mga pulis pa ang nag-escort sa mga Forex officials aron makalikay gikan sa suko nang mga tawo.
Samtang gipasalamatan pa ni Col. Raymundo ang inisyatibang gihimo ni Talacogon Mayor Jesryl Masendo aron maresolba ang problema sa katawhan.
Bisan matud pa og illegal ang operasyon sa Forex, gidayeg niini ang mayor tungod sa paghimo niini og lakang nga makuha-kuhaan ang kasuko sa mga tawo nga possible matud pang musangpot sa dakong kagubot.
