BUTUAN CITY – Hugot nga gikondina sa militar ang pagpanunog sa mga miembro sa rebeldeng New People’s Army sa duha ka mga heavy equipment nga gigamit sa konstruksyon sa farm-to-market road sa Brgy. Binocaran, Malimono, Surigao del Norte ning nakalabay’ng adlaw.
Sa pakighinabi sa Bombo Radyo Butuan, gipadayag ni Captain Josh Pramis, Civil Military Operations (CMO) officer sa 901st Brigade, Philippine Army, gibubu-an og gasolina ug gidagkutan gilayon sa pito ka mga armadong lalaki nga sakop sa Guerilla Front 16B, Northeastern Mindanao Regional Committee ang back hoe ug 10-wheeled dump truck nga iya sa CV Construction kansa tungod matod pa sa wala paghatag og revolutionary tax sa maong kompanya.
Sumala sa opisyal, ang susamang binuhatan sa mga rebelde ang hinungdan nga malangan ang paglambo sa mga lugar sa rehiyon.
Aminado usab ang opisyal nga gilauman na nilang dunay susamang lihok nga himuon ang mga rebeldeng NPA sanglit mao man ang ilang pamaagi aron makapanghulga ug magpakita sa ilang gahom taliwa nga nagkaluya na ang mga niini.
Tungod niini, nanawagan ang ang opisyal ngadto sa katawhan nga makig-alayon kanila aron daling mapugngan ang mga dautang plano sa mga walhong grupo ug hingpit na silang mapukan.
Gibana-banang dul-an sa 6-milyunes pesos ang nahimong damyos sa maong pagpanunog.
