BUTUAN CITY – Tambungan sa mga halangdong bisita gikan sa Australia ug Japan ang paghandom karong adlawa sa ika-81 nga anibersaryo sa Battle of Surigao Strait didto sa Surigao City.
Apil niini sila Australian Ambassador to the Philippines Marc Innes-Brown, Japan Assistant Defense Attaché Commander Kawahata Noriyuki, ug uban pang Japanese delegation nga nangabot na kagahapong adlawa, Biyernes.
Ang giyera sa Surigao Strait, usa ka makasaysayanong panghitabo nga nagpakita sa kaisog, pagkabayani ug sakripisyo sa mga beteranong sundalo ug mga sibilyan nga nakigbisog atol sa ikaduhang gubat sa kalibutan kon World War II.
Himuon ang paghandom karung adlawa, sa Battle of Surigao Strait Memorial sa Brgy. Punta Bilar, Surigao City. Sa iyang pagpamulong, gipadayag ni Australian Ambassador to the Philippines Marc Innes-Brown nga ang ilang pagtambong, isip pagpakita sa ilang lawom nga respeto samtang gi-ila ang ka-isog, sakrispisyo ug pagkamatay sa daghang mga bayani.
