BUTUAN CITY – Nagpagawas sa ilang mga sentimiento ang mga senador nga pabor ug supak sa pagpa-archive sa impeachment complaint batuk kang Vice President Sara Duterte apan ang pamahayag ni Senadora Imee Marcos ang mitatak og maayo tungod sa mga tirada niini sa iyang ig-agaw nga si House Speaker Martin Romualdez.
Nasayrang kabahin si Marcos sa Duterte bloc nga mibotar pabot sa pag-archive sa impeachment case, sa rasong angayang respetuhon ang executory nature sa desisyon sa Supreme Court.
Iya pang gitawag ang mga proponents sa reklamo nga mga spoiled bondying nga migamit sa maong proseso isip ilang political weapon aron lang matangtang sa gahom ang tawong ilang gikalagutan tungod sa ilang ka-insecure.
Gibirahan pa niini ang mga kongresista nga tutukan ang tinuod nga problema sa nasud ug dili kay busgon ug konsentihon ang ilang pinalangga nga bondying matud pa nga naghatag kanila og dakong suhol.
Hinuon iyang gisugyot sa mga kongresista nga mas maayong ilisdan nila ang ilang house speaker tungod kay klaro matud pa kaayo nga ambisyon lang sa taas nga posisyon ang katuyuan sa maong reklamo dayong botar og makabubungog nga ‘yes.’
