BUTUAN CITY – Gibulgar ni Vice President Sara Duterte nga gipangulitawhan na siya sa Partido Demokratiko Pilipino–Lakas ng Bayan kon PDP–Laban aron mudagan sa 2028 national ug local elections dayong butyag nga dili siya interesado sa maong hanyag.
Nasayrang gikan sa maong partido ang pamilya ni VP Sara, ilabina ang amahan niining si kanhi Pangulong Rodrigo Duterte ug igsoong si – Davao City acting Mayor Sebastian “Baste” Duterte isip acting president sa partido.
Gibutyag niining halos kada-semana siyang gi-imbitar nga mu-abin na sa ilang partido nga gitubag lang niya og pasalamat dayong butyag nga dili na siya mubalhin og laing partido tungod kay dili niya kinahanglang makigplastikan sa ubang mga tawo, human mibiya sa Lakas-CMD party.
Gipasabot usab sa Bise Presidente nga nagpabiling regional party sa Davao ang iyang gimugnang Hugpong ng Pagbabago (HNP).
