BUTUAN CITY – Wala’y lipod-lipod nga gipadayag ni Vice President Sara Duterte nga ang impeachment efforts batuk kaniya, gipasi-ugdahan ni Pangulong Ferdinand ‘Bongbong’ Marcos Jr. tungod sa tinguha matud pa niining magpabilin sa gahom uban ang iyang pamilya. Sigon ni Duterte, kabahin ang impeachment process sa paagi sa presidente aron magpabilin sa gahom samtang gidaut ang political influence sa pamilya Duterte.
Intensyon matud pa sa pangulo nga dili mukanaog sa pwesto ug klaro matud pa kini sa mga lihok sa iyang administrasyon batuk sa ilang mga kaaway sa pulitika.
Gani, nasultihan matud pa siya sa usa sa mga kabanay sa pangulo nga gusto kining mudagan pag-usab pagka-presidente. Bisan og wala niini gibutyag kung kinsa ang buot niyang ipasabot, apan gi-angkon ni VP Sara nga nagsugod kini, dihang ang gihingusgan ang people’s initiative ning mi-aging tuig 2024 kansa suportado sa House of Representatives, aron lang ma-usab ang 1987 Constitution.
Dihang wala sila mulampos niini, dinhi na gisugdan ang impeachment effort. Base sa mga ebidensya sa iyang claim, gipadayag ni VP Sara nga makita kini sa pipila ka mga magbabalaud sa House of Representatives nga wala man lang gibasa ang articles of impeachment batuk kaniya dihang ila kining gipirmahan.
Anaa pa ang pag-angkon sa usa ka kongresista atubangan sa publiko nga gibayran ang mga kongresista bugti sa ilang pirma sa maong articles. Tungod kay frontrunner matud pa siya sa presidential race sa 2028, base sa migawas nga mga survey, gitu-uhan niyang gusto nilang papason siya sa ilang dalan.
Gipadayag pa niini nga ang pagpadakop sa gobyerno sa iyang amahan ug pagtugyan niini ngadto sa International Criminal Court tungod sa crimes against humanity, kabahin usab sa plano ni Pangulong Marcos.
