BUTUAN CITY – Malampusong gilusad ni Vice President ug out-going Department of Education Sec. Sara Duterte sa Bayugan City, lalawigan sa Agusan del Sur, ang Go Negosyo: Pampaaralang Taniman ng mga Agribida”, garden-to-table school business model.
Gilusad kini sa Lope A. Asis Memorial Gymnasium sa Bayugan City nga gitambungan sa nagkada-iyang hut-ong sa katilingban.
Ang nasangpit programa, maghatag og negosyo ug panginabuhian sa mga inahan nga wala’y trabaho o negosyo, samtang ang ilang mga anak, nagtungha sa tunghaan diha sa ilang komunidad.
Gipadayag ni VP Sara nga tumong usab niini nga magamit sa mga tunghaan ang mga idle lots sulod sa ilang school premises sa ingon duna’y magamit ang mga inahan nga pangpalit og pagkaon sa ilang kabataan ug matubag na ang problema sa kagutom ug pagkaputot sa pipila ka mga bata tungod sa kawala’y income sa mga ginikanan ilabina niadtong mga anaa sa hilit nga lugar.
Wala makalimti sa besi-presidente ang personal nga pagpasalamat niya ngadto sa iyang gikonsiderang DepEd family tungod sa pag-abag niya nga madumala ang maong departamento.
Nagpasalamat usab siya sa tanang mga Mindanaoans ilabina sa mga Caraganons nga mibotar kaniya sa mi-aging 2022 national elections uban sa iyang pamilya nga gihatagan sila og higayong makaserbisyo sa katawhang Filipino.
Gipasalamatan usab niini ang administrasyon ni Bayugan City Mayor Kirk Asis sa pagsuporta sa maong programa sa DepEd.
Kamatu-uran niini ang paghimo na nila og lettuce garden nga gisundog usab sa katawhan sa palibot nga maoy gitanom sa ilang nataran.
