BUTUAN CITY – Gipadayag ni Bise Presidente Sara Duterte kagabii nga sa mi-aging tuig pa siya naka-recruit sa iyang mahimong running mate alang sa 2028 presidential elections apan wala pa niya kini gibulgar aron maprotektahan ang pagkatawo niini.
Gibutyag kini sa besi presidente pila ka adlaw human niya gipadayag niadtong Miyerkules Pebrero 18 nga mudagan siya pagka-presidente sa 2028 presidential elections.
Iyang gipasabot usab ang papel sa iyang bise presidente kung siya mudaog, sama sa pagpangusog sa pagpatubag sa mga opisyal nga nakabuhat og sayop samtang siya magpokus sa katungdanan isip presidente.
Iyang gipadayag nga wala pa niya ipahibalo ngadto sa iyang amahang si kanhi Pangulong Rodrigo Duterte ang iyang sayo nga deklarasyon dayong butyag nga ang iyang bana nga si Atty. Manases Carpio, mga anak, pipila ka staff ang mitabang sa pagsulat sa iyang Tagalog nga speech, ug ang iyang inahan nga si Elizabeth Zimmerman.
Gidugang pa sa Bise Presidente nga iyang gihimo ang sayo nga anunsyo tungod sa kusog nga singgit ug hangyo sa iyang mga supporters dayong dumdom sa daang pamahayag sa iyang amahan niadtong 2021 nga ang pagka-presidente dili matud pa para sa kababayen-an.
Sumala ni VP Sara, walay kalabutan ang gender sa abilidad sa usa ka tawo nga dumalahon ang usa ka nasud.
