BUTUAN CITY – Gitudlo ni Palace Press Under Secretary Claire Castro si Vice President Sara Duterte isip tinubdan sa matud pa, peke nga balita mahitungod sa pagkalambigit ni First Lady Liza Araneta Marcos sa drug insident sa Estadus Unidos.
Subay niini, gilimod ni Castro ang balita nga nasikop matud pa sa mga otoridad sa US ang unang Ginang. Nasayrang atua sa Miami, Florida ug Los Angeles, California si FL Liza niadtung Marso 5 ngadto sa 8 arun mosalmot sa Meeting of the Minds ingon man sa Manila International Film Festival.
Sumala pa ni Castro nga anaa matud pa sa record nga niabot sa Pilipinas ang unang ginang niadtung Marso 10 ning kasamtangan nga tuig. Marso 11 dihang duna matud pay event nga giapilan si FL Liza kauban sa mga representate sa Girls Scout of the Philippines.
Sumala sa gipakita niining litrato, kauban sa Unang Ginang ang mga representante sa Girls Scout of the Philippines, sama nila National President of the Girl Scouts of the Philippines nga si Dr. Cristina Lim-Yuson; Terrisita Gonzales, GSP Central Board member; ingon man si Roselyn Davadilla, National Executive Director.
Dugang pa ni Castro nga wala matud pa girespeto ni VP Sara ang kalihukan nga gihimo Girls Scout of the Philippines ug gipagawas matud pa sa Bise Presidente nga dili tinood ang maong meeting.
Subay niini, gitubag usab ni VP Sara ang maong mga pasangil ni Castro, apan sugyot lamang niini nga dili na paminawan ang nahisgutang opisyal ingon man ang ig-agaw matud pa niiining si Claire Castro tungod kay basura lamang matud pa ang mga manggawas sa ilahang baba.
