BUTUAN CITY – Aminado si Vice President Sara Duterte nga duna’y panahon nga gusto niyang putlan og ulo si Pangulong Ferdinand ‘Bongbong’ Marcos Jr. dihang gipaka-ulawan niini ang usa ka bata atol sa ilang pagtambong sa graduation ceremony.
Wala na giyagyag ni VP Sara kung asa kini nahitabo apan iyang gibutyag nga nasaksihan niya mismo ug sa mga opisyal nga iyang katapad og lingkod sa entablado dihang gi-insulto sa presidente ang bata nga mihangyo kaniyang iya na lang ang relo niini isip regalo sa iyang graduation.
Ang nahitabo, gipa-usab matud pa sa pangulo ang hangyo sa bata dayong pangutana niini kung nganong iyang ihatag ang iyang relo nga gisabayan og katawa kondiin apil pa sa mikatawa ang duha ka opisyal nga tapad niya og lingkod.
Nakita matud pa niya ang reaksyon sa bata nga klarong na-ulaw kansa dili angayan niining masinatian tungod sa kalinghod pa sa panghuna-huna niini. Dinhi na matud pa siya mi-ulbo sa kalagot ug nabati niyang toxic na ang pagpakig-uban sa pangulo nga daw gusto niya kining putlan og ulo ug ang iyang katapad.
